Xaçmaz rayonunda təmizlik aksiyası keçirilib. Bu haqda ShimalNews 25 may tarixində məlumat verir.
Tədbir “Yaşıl dünya naminə həmrəylik ili” ilə əlaqədar Baş Prokurorluğun təşkilatçılığı ilə Xəzər dənizinin sahilində baş tutub. Aksiyada Baş Prokurorluğun, eləcə də Xaçmaz, Quba, Qusar, Şabran və Siyəzən rayon prokurorluqlarının əməkdaşları, Xaçmaz Rayon İcra Hakimiyyətinin məsul şəxsləri, rayon ictimaiyyəti və könüllü gənclər daxil olmaqla ümumilikdə 100-dən çox şəxs iştirak edib. 2 kilometr sahilboyu ərazi plastik və digər məişət tullantılarından təmizlənib, toplanmış tullantılar aidiyyəti üzrə təhvil verilib.
Aksiyanın əsas məqsədi ətraf mühitin sağlamlaşdırılması, dəniz sahillərində təmizliyə riayət olunmasını təbliğ etmək, sahilyanı ərazilərin məişət tullantıları ilə zibillənməsinin qarşısını almaq və bütün gəncləri dənizətrafı mühitin mühafizəsi uğrunda mübarizəyə cəlb etməkdir.
