Şəki Apellyasiya Məhkəməsində qəsdən sağlamlığa az ağır zərər vurmada təqsirləndirilən Fərid Mərdanovun (ad, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın məlumatına görə, hakim İmanverdi Şükürovun sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilməyib.
İttihama görə, hadisə 08 dekabr 2024-cü il tarixində Zaqatala rayonu, Mosul kəndində qeydə alınıb.
Belə ki, Fərid Mərdanov qonşusu və həmkəndlisi Qoşar Əmirovla (adı və soyadı şərtidir) kafedə spirtli içki qəbul edib. Sonra onlar evə gələn zaman zərərçəkmiş təqsirləndirilən şəxsin və onun ailə üzvlərinin ünvanına nalayiq ifadələr işlədib. Bu zaman Fərid Qoşqara bir neçə bıçaq zərbəsi endirərək bədən xəsarətləri yetirib.
Hadisədən sonra Fərid Mərdanov saxlanılaraq cinayət məsuliyyətinə cəlb edilib.
Şəki Ağır Cinayətlər Məhkəməsinin hökmü ilə o, 3 il 6 ay müddətinə azadlıqdan məhrum edilib.
