Son 2 həftədir ki, sirkə turşusundan zəhərlənmə və ölüm hallarına tez-tez rast gəlinir.
Arıqlamaq üçün sirkə turşusundan istifadə edib ölənlər, sağlamlıq üçün istifadə edib zəhərlənənlər və sair.
Bəs görəsən, sirkə turşusu həqiqətən də insanların arıqlamasına kömək edə bilərmi, yoxsa bu sadəcə bir xurafatdan ibarətdir?
Məsələ ilə bağlı Shimal.News-un sualını cavablayan tibb elmləri doktoru, professor Adil Qeybulla bildirib ki, çəkini normada saxlamağın və ya çəki itirməyin yeganə yolu düzgün qidalanma və fiziki aktivlikdən keçir.
“Digər bütün vasitələr orqanizmi stressə salır və zərər vurur. Arıqlamaq istəyən şəxslər peşəkar dietoloq nəzarəti altında olmalıdırlar. Yeri gəlmişkən, bu gün çox sayda dietoloq olsa da, onların çoxu peşəkar deyil. Buna görə də, işinin əhli olan həkim-dietoloqa müraciət etmək lazımdır.
İnsanlar düşünürlər ki, sirkəli su içməklə arıqlamaq mümkündür. Halbuki bu, tamamilə yanlış və təhlükəli bir yanaşmadır. Sirkə turşusu, xüsusilə, yüksək miqdarda qəbul edildikdə mədə-bağırsaq sistemində ciddi yanıqlara, qıcqırma, ülser və hətta daxili qanaxmalara səbəb ola bilər.
Eyni zamanda, sirkənin tərkibindəki turşu diş minasını da məhv edir, boğaz və yemək borusunda qıcıqlanma yaradır. Bəzən insanlar zəif sirkə deyil, məhz texniki və ya yüksək konsentrasiyalı sirkə turşusundan istifadə edirlər ki, bu, çox təhlükəlidir və ölümə qədər aparan ağır zəhərlənmələrə səbəb ola bilir.
Bir sözlə, özbaşına, təsdiqlənməmiş üsullara əl atmaq olmaz. Xüsusilə də belə güclü kimyəvi maddələrdən istifadə ölümcül fəsadlar törədə bilər”, - deyə professor əlavə edib.
