Xəbər verdiyimiz kimi, son günlər yağıntılı hava və güclü sel Qafqazın ən böyük su kanalı – Samur–Abşeronda təhlükəli vəziyyət yaradıb.
Shimal.News-a danışan Xaçmaz sakinlərinin sözlərinə görə, kanalda suyun səviyyəsi artıq kritik həddə çatıb. Onlar qorxurlar ki, kanal daşsa, qəbiristanlıqlar, evlər və yaşayış əraziləri suyun altında qala bilər.
Bizim.Media-nın məlumatına görə, məsələ ilə bağlı Xaçmaz rayon icra hakimiyyəti başçısının birinci müavini, rayon fövqəladə hallar komissiyasının sədri Anar Oruclu sakinlərin narahat olmalarına əsas olmadığını bildirib. O qeyd edib ki, məsələ barədə Dövlət Su Ehtiyatı Agentliyinin Samur-Abşeron kanalının istismarı üzrə rəsmiləri məlumatlandırılıblar:
"Müvafiq qurum kanalda suyun dövriyyəsinə ciddi nəzarət edir. Bildirilir ki, vəziyyət təhlükəli deyil. Bu gün artıq suyun səviyyəsi 1 sm enib”.
Anar Oruclu həmçinin əlavə edib ki, hazırda su təsərrüfatı işçiləri Taxtakörpü su anbarının doldurulması üçün səfərbər olunublar. Çünki Bakının su ehtiyatı bu kanaldan asılır və onun daim dolu olması zəruridir.
