Balakən, Zaqatala, Qax və qonşu rayonların sakinləri bu gün həyəcan təbili çalır. Onlar “mərmər bağacığı” (mərmər taxtabiti) adlanan böcəklərin kütləvi şəkildə hücumuna məruz qalıblar.
Bu barədə Shimal.News-a danışan sakinlər bildiriblər ki, vəziyyət çox ciddidir. Artıq bu həşəratlar evlərin içinə dolur və onlardan qurtulmaq mümkün deyil:
“Hər tərəfi bağlayırıq, amma yenə evə dolurlar. Artıq paltarlarımızın, yeməyimizin içindən çıxırlar. Bəlkə də bu problem paytaxta çatanda tədbir görüləcək,” – deyə sakinlər gileyləniblər.
Müvafiq qurumların bu vəziyyətə qarşı tədbir görməməsi narazılıq doğurur. İnsanlar şəxsi vəsaitləri hesabına müxtəlif kimyəvi dərmanlardan istifadə edərək mübarizə aparmağa məcbur qalıblar.
Məlumat üçün bildirək ki, xüsusi təhlükəli olan bu zərərvericilər MDB məkanında ilk dəfə 2015-ci ilin payız aylarında Rusiyanın Soçi şəhərində müşahidə olunub. Daha sonra Gürcüstana, Azərbaycana və Rusiyanın cənub ərazilərinə yayılıb.
