Azərbaycanda ilk dəfə olaraq Beynəlxalq Barbekü Festivalı Şamaxının Meysəri kəndində keçirilir.
Shimal.News xəbər verir ki, bu gün və sabah davam edəcək tədbirdə müxtəlif ölkələrdən nümayəndələr iştirak edir.
Bunların sırasında Dünya Barbekü Assosiasiyasının (WBQA) prezidenti Villem Vink (Willem Vink), Dünya Barbekü Assosiasiyasının baş hakimi Kristofer Sandford (Chirstopher Sandford), Dünya Aşpazlar Assosiasiyasının (WACS) keçmiş prezidenti, Səudiyyə Ərəbistanı kralının şəxsi aşpazı Tomas Quqler (Thomas Gugler), eləcə də dünyanın müxtəlif ölkələrindən tanınmış şef-aşpazlar bir çox ölkələrin kulinariya assosiasiyalarının prezidentləri, “Michelin” mükafatına layiq görülmüş ustalar, kulinariya hakimləri var.
Ölkəmizdə qonaq olan dünyaca məşhur şef-aşpazlar bu gün festival ərəfəsində Bakının tanınmış restoranlarından birində müxtəlif yeməklərin hazırlanmasında iştirak edirlər.
“Bu festivalda iştirak edən aşpazlar öz mətbəxlərinin yeməklərini göstərəcəklər. Eyni zamanda bizim mətbəxin yeməklərini də görəcəklər. Biz bunu tərifləmirik, amma şeflər deyirlər ki, Azərbaycan mətbəxi dünyada ən gözəl 5 mətbəxdən biridir”, - deyə beynəlxalq kulinariya hakimi Sahib-David İsrafilov bildirib.
Tədbirin ən parlaq hissələrindən biri isə jurnalist və bloqerlər arasında keçiriləcək yarış olacaq. Yarışın sonunda dad, bişirmə dərəcəsi və təqdimat formasında fərqlənən komandalar sertifikatlar, medallar və tərəfdaşlar tərəfindən təqdim edilən əsas kubok uğrunda mübarizə aparacaqlar.
