Şəki Apellyasiya Məhkəməsində qəsdən sağlamlığa ağır zərər vurmada təqsirləndirilən Mühid Qarayevin (adı, soyadı şərtidir) barəsindəki qərardan verilən apellyasiya şikayəti üzrə məhkəmə iclası yekunlaşıb.
Pravda.az-ın məlumata görə, hakim Akif Eyvazovun sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilməyib.
İttihama görə, hadisə 01 oktyabr 2024-cü il tarixində, gecə saat 23 radələrində Balakən rayonunun Kortala kəndində yerləşən “Ruslan” şadlıq sarayının həyətində qeydə alınıb.
Belə ki, Mühid Qarayev sözügedən şadlıq sarayının həyətində aralarında şəxsi münasibətlər zəminində yaranmış mübahisə zamanı həmkəndlisi, zərərçəkmiş Zamin Ələkbərzadənin (adı, soyadı şərtidir) baş nahiyəsinin sol tərəfinə yumruq vurub ona xəsarətlər yetirib.
Hadisədən sonra Mühid Qarayev saxlanılaraq cinayət məsuliyyətinə cəlb edilib.
Şəki Ağır Cinayətlər Məhkəməsinin hökmü ilə o, 2 il 11 ay 29 gün müddətə azadlıqdan məhrum edilib.
