Dünyada və Azərbaycanda arıların kütləvi məhvi alimləri ciddi narahat edir.
Dünyanın müxtəlif ölkələrindən gələn arıçılıq üzrə mütəxəssislər Zaqatala və Şəkidə arı təsərrüfatlarında olub, arı ailələrindəki ölüm səbəblərini araşdırıblar.
Zaqatala Arıçılar Birliyinin sədri Mövləddin Qurbanəliyevin təşəbbüsü ilə Qazaxıstan, İsrail və Rusiyadan gələn arıçı alim və mütəxəssislər rayonda müxtəlif təsərrüfatlara baş çəkib, onların iş şəraiti və qayğıları ilə maraqlanıb.
Rusiyanın Kirov vilayətindən gələn, kənd təsərrüfatı elmləri doktoru Anna Brendorf Bizim.Media-ya açıqlamasında bildirib ki, arılar arasında yayılan xəstəlik və viruslar son illər çoxalıb:
“Kütləvi arı ölümlərinə dünyanın hər yerində rast gəlinir. Bu məsələni araşdırmaq üçün xeyli vaxt tələb olunur”.
Qazaxstanlı alim Oleq Krupskiy hesab edir ki, arıların azalması, xəstələnməsi, viruslara yoluxması ekoloji problemlərin də artması ilə nəticələnir:
“Biz arılarla nəfəs alan insanlarıq. Bu baxımdan bütün dünyada arıların artmasına təkan vermək, hətta dövlət səviyyəsində dəstək göstərmək vacibdir”.
18 ildir arıçılıq sahəsini bütün dərinliyinə qədər araşdıran, virus və xəstəliklərlə bağlı çox sayda laborator araşdırmalar aparan Viktoriya Skokker İsraildən gəlib. Bu sahədə göstərdiyi xidmətlərə görə Beynəlxalq Arıçılar İttifaqının üzvlüyünə qədər yüksələ bilib. Viktoriya xanım dünyanın 6 qitəsində arı ailələrini, onların ölüm səbəblərini araşdıran nadir alimlərdən sayılır. Onun bu səfərində əsas məqsəd də Azərbaycanda arı ailələri arasında xəstəlik və virusları araşdırıb yerli mütəxəssislərə kömək etməkdir.
Xarici mütəxəssislər Qanıx çayı vadisindəki arıçılıq təsərrüfatlarında vəziyyətlə tanış olduqdan sonra daha bir neçə istiqamətdə yerləşən arıçılıq təsərrüfatlarına baş çəkib, hər birinin problem və qayğılarını öyrəniblər.
Arıçı alimlərin ilkin rəyi ondan ibarətdir ki, ölkəmizdə bu sahənin inkişafı üçün yetərincə bitki örtüyü və hava-iqlim şəraiti mövcuddur.
Sadəcə olaraq arı növlərinin iqlimə uyğunlaşmasını, onların virus və xəstəliklərə davamlı olmasını təmin etmək üçün yollar axtarılmalı və tapılmalıdır. Bunun üçün isə ilk növbədə təcrübə mübadiləsi davam etdirilməli, vaxtaşırı görüşlər keçirilməlidir.
