Novruz bayramının gəlişinə sayılı günlər qaldı. Bu il ölkəmizdə əvvəlki illərdən fərqli olaraq Novruz və onbir ayın sultanı hesab olunan Ramazan bayramı eyni vaxtda qeyd olunur.
Bizim.Media-nın məlumatına görə, indi hər kəs bayram bazarlığına hazırlaşır. Əksər alıcılar supermarketlərə deyil, bazarlara üz tuturlar. Çünki bazarda olan məhsullar həm keyfiyyətli, həm təzə, həm də qiymətinə görə insanların cibinə münasib olur.
Bayramqabağı qiymətlər necədir, bahalaşma varmı?
Zaqatalada yerləşən kənd bazarında yerli meyvələr 1-1.5 manat, tərəvəzlər 20-40 qəpikə, ət 15-17 manat və balıq məhsulları 8-14 manata satılır. Satıcılar ümumilikdə qiymətlərin ötən illə nisbətdə ciddi dəyişmədiyini bildirirlər. Onlar ötən il baha satdıqları bəzi yerli meyvələri bu il bazara daha ucuz qiymətə çıxardıqlarını da vurğulayıblar.
Lakin qoz, fındıq və şabalıdın da qiymətində artım müşahidə olunub. Ötən il fındığın qiyməti 3-5 manat idisə, bu il 4-10 manat arasında dəyişib. Qoz, badam və şabalıd qiymətləri isə 6-8 manat arasında dəyişir.
Bu gün üçün bazarda alıcı qıtlığı müşahidə olunur. Bəzi alıcılar yarmarkanı gəzib əliboş getsə də, alış-veriş edənlərə də rast gəlinir. Onların bir neçəsinin qiymətlərə münasibətləri öyrənilib.
Alıcıların sözlərinə görə, ötən ilə nisbətdə meyvə-tərəvəzin, ət, balıq və ev quşlarının qiymətində artım müşahidə olunmur. Onlar pulun dəyər itirdiyini, əsasən bayram günlərində bazarda qiymlərdə fərq yarandığını diqqətə çatdırırlar.
Sakinlərin sözlərinə görə ümumilikdə orta dörd nəfərlik ailə üçün builki Novruz bayramına 120-150 manatla hazırlıq görmək mümkündür.
