"Nə? Harada? Nə zaman?" intellektual oyunu üzrə "Məktəbli Liqası" çərçivəsində keçirilən "Məktəbli Kuboku"nun qalibləri müəyyənləşib.
Shimal.News xəbər verir ki, oktyabr ayından etibarən Bakı ilə yanaşı bir sıra regionlarda sinxron şəkildə təşkil olunan seçim turlarında 70-dən artıq komanda final mərhələsinə vəsiqə uğrunda mübarizə aparıb. Oyunlar Quba, Qusar, Xaçmaz, Şəki, Balakən, Sabirabad, Saatlı və Beyləqan şəhərlərində keçirilib.
Üç seçim turunun yekunlarına əsasən Bakı və regionlardan ümumilikdə 22 komanda finala yüksəlib. 36 sualdan ibarət final turu gərgin və maraqlı intellektual mübarizə ilə yadda qalıb.
Turnirin nəticələrinə görə ümumi sıralamada:
I yer – "Vesper"
II yer – "El Rey"
III yer – "Zəkalar"
Region komandaları arasında isə:
I yer – Saatlı rayonunun "Birlik" komandası
II yer – Beyləqan rayonunun "Gəraylar" komandası
III yer – Xaçmazı təmsil edən "NanoTex" komandası
Qaliblər kubok, medal və digər dəyərli hədiyyələrlə mükafatlandırılıblar.
Qeyd edək ki, layihə Xəzər İntellektual Gənclər Klubunun təşkilatçılığı, Global Olympiad Center və RM Nəşriyyatının dəstəyi ilə həyata keçirilib. Bu il ana dilli intellektual hərəkatın 25 illik yubileyi qeyd olunur və il ərzində keçiriləcək layihələr bu əlamətdar tarixə həsr ediləcək.
