Qax rayonunda 1994-cü il təvəllüdlü Əmrah ailə münaqişəsi zəminində yaranan mübahisə zamanı keçmiş həyat yoldaşı Ləmanı (adlar şərtidir – red.) döyüb.
Demokrat.az-ın məlumatına görə, hadisə 14 sentyabr 2025-ci il tarixində Qax şəhərində yerləşən gözəllik salonunda baş verib.
Yevlax rayon sakini Əmrah Ləmanın onu salondan qovması səbəbindən aralarında yaranan mübahisə zamanı qadının baş və bədən nahiyələrinə bir neçə dəfə yumruq və təpik zərbələri endirib.
Hadisəni törədən barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham irəli sürülüb.
İş üzrə ifadə verən Əmrah ona elan olunmuş ittiham üzrə özünü təqsirli bilib. O bildirib ki, hadisədən təxminən 2–3 ay əvvəl keçmiş həyat yoldaşı Ləmanla rəsmi qaydada boşanıblar:
"Boşanmağımıza səbəb ailə daxilində tez-tez baş verən söz-söhbətlər olub. Ayrıldıqdan sonra da aramızdakı mübahisələr davam edirdi. Dəfələrlə Ləmanla telefonla danışaraq barışmaq istədiyimi demişəm. Lakin o, buna razılaşmayıb və bu səbəbdən aramızda mübahisələr yaranıb".
Əmrah qeyd edib ki, sentyabrın 14-də təxminən saat 17:00-da keçmiş həyat yoldaşının işlədiyi gözəllik salonuna gedərək onunla danışmaq qərarına gəlib:
"Həmin vaxt salonun qapısını açanda Ləmanın telefonla danışdığını gördüm. Salonda başqa heç kim yox idi. Ondan kimlə danışdığını soruşdum. O isə aqressiv cavab verərək salonu tərk etməyimi tələb etdi. Bu sözlər məni əsəbiləşdirdi, onun əlindəki telefonu alıb yerə vuraraq sındırdım. Daha sonra əsəblərimə hakim ola bilmədim və aramızda mübahisə yarandı. Mübahisə zamanı onun sifət nahiyəsinə yumruqla, bədən nahiyəsinə isə təpiklə vurmağa başladım. Ləman ağladığı üçün salonu tərk edərək getdim".
Qax Rayon Məhkəməsinin qərarı ilə Əmrah 6 ay müddətinə azadlığın məhdudlaşdırılması cəzasına məhkum edilib. Təqsirləndirilən şəxsə cəza çəkdiyi müddət ərzində gecə saat 23:00-dan səhər saat 07:00-dək yaşayış yerini tərk etmək, həmçinin Yevlax rayonu ərazisindən kənara çıxmaq qadağan olunub.
Bundan əlavə, ona cəzaçəkmə müddəti ərzində elektron nəzarət vasitəsini daşımaq və həmin vasitənin işlək vəziyyətdə saxlanılması üçün ona xidmət etmək öhdəliyi qoyulub.
Həmçinin təqsirləndirilən şəxs məhkəmənin icazəsi olmadan yaşayış yerini dəyişdirməməli, iş və ya təhsil yerini dəyişdirdiyi halda isə cəzanın icrasına nəzarət edən orqanı əvvəlcədən məlumatlandırmalıdır.
