Xaçmaz şəhərində insan həyatı üçün ciddi təhlükə yaradan vəziyyət var.
Shimal.News-a danışan sakinlər bildiriblər ki, söhbət Mehman Babayev adına 1 nömrəli tam orta məktəbin arxa hissəsində yerləşən elektrik qurğularından gedir.
Bildirilib ki, ərazidə yerləşən elektrik transformatoru lazımi şəkildə mühafizə olunmayıb. Lakin daha təhlükəli məqam transformatorun qarşı tərəfində yerləşən elektrik lövhələrindədir. Belə ki, həmin lövhələrdəki naqillər qutudan açıq şəkildə çölə çıxıb və çılpaq vəziyyətdə qalıb.
Sakinlərin sözlərinə görə, məktəbin ətrafında hər gün çoxlu sayda şagird hərəkət edir. Uşaqların burada oynadığı və ya həmin ərazidən keçdiyi nəzərə alınsa, açıq vəziyyətdə qalan elektrik kabelləri onların həyatı üçün ciddi risk yaradır.
Buna baxmayaraq, təhlükəli vəziyyətin aradan qaldırılması üçün hələ də addım atılmayıb.
Sakinlər aidiyyəti qurumları məsələyə operativ reaksiya verməyə, məktəb ətrafında yerləşən elektrik qurğularını təhlükəsiz vəziyyətə gətirməyə və potensial faciənin qarşısını vaxtında almağa çağırıblar.
