Xaçmaz şəhərində məişət tullantılarının idarə olunması ilə bağlı yeni tədbirlər görülür.
Shimal.News-un məlumatına görə, iri ölçülü açıq zibil yeşikləri tədricən ağzı bağlı və daha tutumlu zibil konteynerləri ilə əvəz olunur.
Bundan öncə redaksiyamız mövzunu gündəmə dəfələrlə gətirib. Yerli əhali əvvəllər açıq konteynerlərin yaxınlığında yaranan antisanitar vəziyyətdən - ətrafa səpələnmiş tullantılardan, üfunət iyindən və küçə heyvanlarının zibilləri yaymasından narazı idi.
Bu dəyişiklik sakinlər tərəfindən uzun müddətdir gözlənilən addım kimi qarşılanır. Onlar fikirləşirlər ki, yeni qapaqlı konteynerlərin quraşdırılması bu problemlərin qarşısını almağa və ictimai yerlərin daha təmiz saxlanmasına kömək edəcək.
Mütəxəssislər hesab edirlər ki, açıq zibil yeşikləri insanların sıx yaşadığı ərazilər üçün uyğun deyil və yerlərdə antisanitar vəziyyətin yaranması ilə nəticələnir. Qapaqlı konteynerlər isə həm gələcəkdə tullantıların daha səliqəli toplanmasına, həm də şəhər məkanının səliqə-sahmana salınmasına təkan verəcək.
