Qax rayonunun Çinarlı kəndi təbiətin bütün səxavətini üzərinə çəkmiş nadir yaşayış məskənlərindən biridir. Ancaq bu gözəlliyin fonunda acı bir reallıq gizlənir – kəndin sosial və mədəni problemləri illərdir həllini tapmır.
Shimal.News məlumat verir ki, tarixi irsi ilə seçilən Çinarlı kəndində XVII əsrə aid məscid mövcuddur. İbadətgah hazırda baxımsız vəziyyətdədir və uçub-dağılmaq təhlükəsi ilə üz-üzə qalıb.
Kənd sakinlərinin sözlərinə görə, sonuncu dəfə sovet dövründə təmir olunan məscid bu gün acınacaqlı haldadır. Divarları çatlayıb, dam örtüyü yararsız vəziyyətə düşüb, bina isə tədricən xarabalığa çevrilir. Sakinlər bildirirlər ki, məsələ ilə bağlı aidiyyəti qurumlara dəfələrlə müraciət olunsa da, indiyədək hər hansı real addım atılmayıb.
Ötən il yerli televiziya kanalları mövzu ilə bağlı Mədəniyyət Nazirliyi ilə əlaqə saxlayaraq məsələni gündəmə gətiriblər. Nazirlikdən isə bildirilib ki, məscidin vəziyyəti ilə bağlı onlara nə kənd sakinlərindən, nə də digər qurumlardan rəsmi müraciət daxil olmayıb. Görünür, məsul qurumlar bununla məsələnin bağlandığını düşünürlər.
Təbiəti ilə cənnəti xatırladan Çinarlı kəndində tarixi irsin bu şəkildə sahibsiz qalması ciddi suallar doğurur. Görəsən, əsrlərin yadigarı olan bu məscid yalnız tamamilə xarabalığa çevrildikdən sonra xatırlanacaq? Kənd sakinləri ümid edirlər ki, səlahiyyətli qurumlar gec olmadan bu səsə səs verəcək və Çinarlının unudulan tarixinə sahib çıxacaqlar.
