Oğuz rayonunun Xalxalqışlaq kəndinə gedən yol yararsız vəziyyətə düşüb.
Bu barədə Shimal.News-a kənd sakinləri məlumat veriblər.
Bildirilib ki, kəndə aparan yolun təxminən 2 kilometrlik hissəsi uzun illər təmir olunmadığından səthində çoxsaylı çalalar yaranıb. Yağıntılı hava şəraitində bu çalalara dolan su iri gölməçələrə çevrilir, nəticədə həm piyadaların, həm də nəqliyyat vasitələrinin hərəkəti xeyli çətinləşir.
Sakinlərin sözlərinə görə, məsələ ilə bağlı kənd bələdiyyəsinə və Azərbaycan Avtomobil Yolları Dövlət Agentliyinə müraciət olunsa da, indiyədək yolun təmiri istiqamətində hər hansı iş görülməyib.
