Bu gün Boz ayın ilk çərşənbəsi – Su çərşənbəsidir.
Su çərşənbəsi ilə bağlı xalq arasında müxtəlif adət-ənənələr yaşadılır. Kənd yerlərində insanlar axar su kənarına gedərək əllərini və üzlərini yuyurlar. Qədim inanclara görə, bununla insanın üzərindəki ağırlıq və pisliklər su ilə axıb gedir, yeni ilə saf niyyətlə qədəm qoyulur.
Şimal bölgəsində isə maraqlı bir ənənə mövcuddur. Bulaqdan su götürən qadınlar həmin suyu küçə boyu qapılara və hasarların dibinə səpirlər. Bu, evə bərəkət və ruzi arzusunun rəmzi hesab olunur.
Su çərşənbəsi eyni zamanda Novruz bayramına hazırlıqların başlanğıcı sayılır. Həmin gün süfrələr bəzədilir, evlərdə təmizlik işləri aparılır. İnanca görə, süfrəyə qoyulan su qabının daşması ilin bərəkətli keçəcəyinə işarədir.
