Çətin şəraitdə və tənha yaşayan Oğuz rayon sakini 59 yaşlı Xəlil Tanverdiyev çarəsiz vəziyyətdə olduğunu bildirib.
Baku TV-nin məlumatına görə, vətəndaş gözlərində problem olduğunu, anadangəlmə zəif gördüyünü bildirir. İldən-ilə vəziyyəti daha da ağırlaşıb və hazırda onun görmə qabiliyyəti çox aşağı səviyyədədir.
Vətəndaş deyir ki, bir neçə dəfə Şəki və Oğuz Rayon Mərkəzi Xəstəxanalarında müayinədən keçsə də, əlilliyin təyin olunması üçün göndəriş ala bilmir.
Onun çətin şəraitdə yaşaması ilə bağlı isə Oğuz Rayon İcra Hakimiyyətindən qeyd edilib ki, vətəndaşın əvvəllər hər hansı müraciəti qeydə alınmayıb. Çəkilişdən sonra RİH başçısının Oğuz şəhəri üzrə nümayəndəsi onunla evində görüşüb, pensiya təminatı ilə bağlı hara və necə müraciət etməli olduğu barədə məlumat verib, maddi yardım göstərilməsi üçün rəsmi ərizəsi qəbul olunub. Bildirilib ki, yaxın müddətdə RİH tərəfindən ona maddi köməklik göstəriləcək.
