Ali Məhkəmədə ehtiyatsızlıqdan zərərçəkmiş şəxsin ölümünə səbəb olmaqda təqsirləndirilən Elçin Mirzəzadə barəsində çıxarılan qərardan verilmiş kassasiya şikayəti üzrə məhkəmə iclası başa çatıb.
Pravda.az-ın məlumatına görə, hakim İlqar Qılıcovun sədrliyi ilə keçirilən prosesdə qərar elan olunub. Qərara əsasən, kassasiya şikayəti təmin edilməyib.
Şəki Ağır Cinayətlər Məhkəməsinin hökmü ilə Elçin Mirzəzadə 9 il müddətinə azadlıqdan məhrum edilib və cəzasını ümumi rejimli cəzaçəkmə müəssisəsində çəkməsi müəyyən olunub. Şəki Apellyasiya Məhkəməsi də apellyasiya şikayətini təmin etməyib.
İttihama görə, 2023-cü il sentyabrın 30-da İsmayıllı şəhər sakini, 67 yaşlı Füzuli Ağamalıyevin müalicə olunduğu xəstəxanada ölümü barədə rayon prokurorluğuna məlumat daxil olub. Aparılan ilkin araşdırmalar zamanı 46 yaşlı Elçin Mirzəzadənin şəhər ərazisində yerləşən ictimai-iaşə obyektlərindən birində kəsici-deşici alətlə Füzuli Ağamalıyevə xəsarət yetirdiyinə və onun bu xəsarət nəticəsində vəfat etdiyinə dair əsaslı şübhələr müəyyən edilib.
Faktla bağlı İsmayıllı Rayon Prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb və istintaq aparılıb. Elçin Mirzəzadə iş üzrə şübhəli şəxs qismində saxlanılıb.
