Sədaqət Kərimovanın şəxsi maddi vəsaiti hesabına lentə alınan “Soyuq günəş” (Къайи рагъ) ekran əsəri ləzgi dilində çəkilən ilk bədii film hesab edilir. Ekran əsəri 2018-ci ildə real hadisələr əsasında lentə alınıb. Filmin təqdimatı 16-17 mart 2020-ci ildə “Nizami” kino mərkəzində edilməli idi. Lakin 6 gün qalmış karantin rejimi elan olunduğundan film “Youtube” portalında izləyicilərə təqdim olunub.
Ekran əsərinin əsas hadisələri 1940-cı illərə aiddir. Qusarın Həzrə (ləzgicə Яргун) kəndində bir-birini sevən iki gənc - Yarmət və Yarqunatın məhəbbətindən bəhs edir. Ancaq burada söhbət təkcə məhəbbətdən getmir. Filmin əvvəllində bu sözlər qeyd olunub: “Biz bu filmdə ləzgi xalqının özünəməxsus adət-ənənələrini, milli-mənəvi dəyərlərini göstərməyə çalışmışıq. Bu film bizim ləzgi xalqına böyük sevgimizin ifadəsidir”. Həmçinin film Böyük Vətən müharibəsi mövzusuna və onun ağır aqibətinə də toxunur.
Sədaqət Kərimovanın sözlərindən: ““Soyuq günəş” dramını 1998-ci ildə qələmə almışam. İlk arzum onun Azərbaycan və ya Dağıstanın hər hansı bir şəhər və ya əyalət teatrında səhnəyə qoyulması olub…”.
Filmin çəkilişləri Qusar rayonunun Həzrə kəndində və Türkiyədə aparılmışdır. Ekran əsəri ləzgi dili ilə yanaşı, həm də Azərbaycan və rus dillərində də nümayiş olunur. Film bütün Qafqazda, Rusiyada, Türkiyədə, Avropa və Asiya ölkələrində, ABŞ-də seyr edilir.
Ekran əsərinin ssenari müəllifi və bəstəkarı Sədaqət Kərimova, rejissoru Məlahət Əhməd, quruluşçu rejissoru Elşən Zeynallı, montajçı Nicat Qayıbov, səs rejissoru Teymur Kərimovdur. Baş rollarda isə İranə Kərimova və Mirsənan Kazımov çəkiliblər.
Hazırda film “Youtube”da Azərbaycan dilində 7 milyondan çox, rus dilində 4,5 milyon, ləzgi dilində isə 2 milyona yaxın baxış yığıb.
[video width="1920" height="1080" mp4="https://shimal.news/storage/photos/2023/07/videoplayback11.mp4"][/video]
İstinad edilən mənbələr:
